尋日寫左第一回既故事，頂，原來寫故事真係好辛苦，要諗要舖，又要搵位停，我無可能夠字數就停嘛，完美主義者如我，真係一路寫一路刪一路改，寫左個幾鐘都係寫左大半，仲要自己唔係好滿意，又眼訓，嬲嬲地寫返散文先……
今日有朋友俾左個好好既題材我，可以快寫分享比大家，就係一個人要識得問問題。
呢個post有好多巴絲都問我好多意見，而我都盡能力去答大家，但我發現左一個問題既問題，就係大家唔係好識問問題。
你問，我答，好正常，但絕大部份人，或者係上網唔想講太多自己野，所以都問得好隱悔，舉幾個例子比大家，唔係想映射大家，純粹想大家有得進步下。
「九叔你覺得點先可以搵多d生意？」
「我想試下行呢條路可以點？」
其實我明大家都想知多少少野，但係問問題上面就顯得唔夠好了。
作為一個sales，或者作為一個創業既人，要好識得問問題。
點解你要問問題？因為你需要知道答案！而一條好既問題，可以令你得到一個好既答案！一條差既問題，就好易變成鳩問鳩答，你今日食左早餐未啊？食左！你得到左你想要既野咩？
作為一個答問題既人，我要好清楚你既情況先可以答到你，九叔我唔係睇相佬，就算我係睇相佬都好，我都要知你時辰八字先可以幫你算啊！
有好多野都可以普遍地說，例如學校既理論，基本知識，但大家出黎做野，已經唔係學習基礎既階段，想做好，需要既係實踐、消化、改良、應用。
我寫既野可以分成幾類：
一）基礎
二）例子
三）資訊
如果你想聽大路野，我會係基礎度講，通常人人都可以袋到少少野；例子的話就唔一定個個用到，好睇你同呢件事有冇關係；資訊性既野唔怕睇得多，總有用得著既機會，又或者可以令你明多少少野。
呢三種野都係一種passive information，你係受者，我寫，你睇。
但問問題唔一定，係你問，我答，所以你問既野決定到我答既野。
唔好講唔同行，就連係男係女，幾多歲，咩外表，咩性格都可以令你既策略有所不同，點解大家覺得唔需要自我介紹就令我可以答到一個屬於你既答案呢？
當然，亦有唔少人係問得好好，好有啟發性，我都好願意去答多少少，即使我唔知正確與否。
希望大家之後既留言，可以問得好少少問題，對你之後既人生都會好有幫助！明天見
Source: https://lih.kg/hnxGkCX
沒有留言:
張貼留言